Kynjasögur

Engillinn Snorri Sturluson verður æfur af bræði við að lesa það sem fræðimenn höfðu um hann skrifað í sjöhundruð ár. Hann tekur sér hlé frá að skrifa sögu himnaríkis, og ákveður að snúa aftur í Reykholt, en nú fer í verra. Nýi kennarinn skilur ekki baun þegar hann hittir unglingana í héraðsskólanum, og skellihlær þegar hann sér að á stöpli í bæjarhlaðinu stendur græn skessa í baðkápu. Þegar skyggir sækja að Snorra aðrar forynjur illskeyttari, og senn rís að nýju Árni beiskur með öxi sína … Í smásagnasafninu Kynjasögum er brugðið á leik um íslenskan samtíma. Georg drekabani hinn helgi, Adam og Eva, Jane og Tarzan apafóstri gerast hér ríkisborgarar lýðveldisins og laga sig að amstri þess og undrum. Hversdagslegri þegnar mæta síðan óvæntum kynjum úr fortíð og fjörrum stöðum, Hinrik og Anna á sumarfeðalagi fram af Múlanum, Svarri Víkingur leigubílstjóri kemst í hann krappan þegar hann ákveður að fá sér konu. Böðvar Guðmundsson er landsþekktur sagnamaður og ljóðskáld. Með Kynjasögum dregur hann upp undirfurðulegar myndir úr íslenskum veruleik, og fer á kostum í fyndinni frásögn þar sem allt getur gerst.

© 2022 Hljóðbók.is (Hljóðbók): 9789935222688

Útgáfudagur

Hljóðbók: 23 mars 2022