App Store

Google Play

{{seriesTitle}} - سلسلة الكتب

Details page - Device banner - 894x1036

خطوة إلى عالم لا حدود له من القصص

الاستماع والقراءة

طاهر المعتز بالله

أكبر إبادة عرقية في التاريخ!

في القرن الخمستاشر، بينما الصراعات الدينية والعسكرية مشتعلة في أوروبا والحروب الأهلية في إنجلترا أو ما يسمى بحرب الورود، ملهمة الروائي جورج رر مارتن بكتابة سلسلة صراع العروش، كان المستكشف الإيطالي كريستوفر كولومبوس على ميعاد مع اكتشاف هيغير مجرى التاريخ! 

أقنع كولمبوس ملك إسبانيا بتمويل رحلاته لأمريكا بعد اكتشافها صدفة، أغراه بالمجد المنتظر وكنوز الدهب ونشر المسيحية بين السكان الأصليين. وفي خلال تلات قرون دارت حروب بين قوى أوروبا العظمي، إنجلترا وإسبانيا وفرنسا، للسيطرة على الاكتشاف الجديد. انتهت ببناء المستعمرات والإبادة العرقية لملايين الهنود في مذابح أشبه بالهولوكوست، والانتشار السرطاني في الأرض الجديدة، بأسلوب متماثل مع أسلوب استعمار الحركة الصهيونية لفلسطين.

الاستعمار وجه من عملة وجهها الآخر الاستعباد، وزي ما استولى الرجل الأبيض على الأراضي الأمريكية وسحق ثقافة وهوية أصحاب الأرض، بيحاول الكيان الصهيوني فعل نفس الأمر مع الفلسطينيين. لكن مخططه دايمًا مهدد بالفشل بسبب المقاومة الفلسطينية!

"غزو أمريكا" قصة اكتشاف الأمريكتين والاحتلال الإسرائيلي لفلسطين، إهداء للأطفال اللي ماتوا على يد الاحتلال.

 غزو أمريكا كتاب بالعامية المصرية من سلسلة «الدحيحة»، بصوت «الدحيح» أحمد الغندور، ومن تأليف طاهر المعتز بالله مؤلف كتاب الدحيح وأحد كتّاب أهم وأشهر حلقات البرنامج.

من إنتاجات ستوريتل الأصلية

استمع الآن.

أحمد الغندور

Storytel Original

الدحيحة

الدحيحة - غزو أمريكا

زي ما عندهم كريستيانو عندنا صلاحيانو!

في الوقت بدل الضايع من ماتش المنتخب المصري مع الكونغو في تصفيات كاس العالم، كان صلاح على ميعاد مع تسجيل أهم ضربة جزاء في تاريخ كرة القدم المصرية، أمام 80 ألف متفرج في استاد القاهرة، وكانت سبب في تأهل مصر لكاس العالم بعد غياب 28 سنة.ملايين المصريين شافوه واقف يسدد بهدوء وثبات وتركيز، لكن اللي محدش يعرفه إنه اتدرب على نفس اللعبة قبل الماتش وشاطها بنفس الأسلوب تلات مرات على عصام الحضري وصدهم كلهم! إيه سر نجاحه في المرة الرابعة؟

قصة حياة محمد صلاح للدحيحة، ومحطاته مع الإرادة والأمل، إزاي قدر يطور أدائه الدفاعي مع المدرب الإيطالي سباليتي في نادي روما؟ رسالته لدروجبا في لحظة إحباط أثناء لعبه لتشيلسي، وبجانب دا بنعرف عن طريق علم النفس أسباب ردود الفعل العنيفة على دعمه لوردة وتأخره في دعم القضية الفلسطينية في الاعتداء الأخير على غزة. 
من باك شمال مغمور ساكن في أوضة في استاد المقاولون العرب لهداف الدوري الإنجليزي للمرة التانية على التوالي وبطل التشامبيونز ليج وأحد أعضاء نادي المئة. رحلة طفل قدرته على الأمل تفوق قدرته على التهديف، محمد صلاح فخر العرب اللي حب الجمهور ليه تعدى مجرد حب لاعب كرة قدم!

محمد صلاح كتاب بالعامية المصرية من سلسلة «الدحيحة»، بصوت «الدحيح» أحمد الغندور، ومن تأليف طاهر المعتز بالله مؤلف كتاب الدحيح وأحد كتّاب أهم وأشهر حلقات البرنامج.

من إنتاجات ستوريتل الأصلية

استمع الآن.

الدحيحة - محمد صلاح

يطفو كالفراشة ويلدغ كالنحلة!

قصة أشهر ملاكم في التاريخ، فاز ببطولة العالم في الوزن التقيل وعمره اتنين وعشرين سنة، وأول تصريح ليه بعد الفوز كان قنبلة مدوية في الأوساط العالمية، أعلن اعتناقه الإسلام وانضمامه لمنظمة "أمة الإسلام" تحت اسم محمد علي كلاي!

حول الملاكمة من رياضة أقرب لمصارعة التيران لفن معتمد على المهارة والذكاء وسرعة رد الفعل قبل القوة.
فاجئ العالم بأسلوب لعب جديد، إيده جنبه ووشه مكشوف، يغري الخصم إنه يضرب ويتفوق عليه بسرعة رد فعله وتفادي الضربة قبل ما يرد بلكمة مضادة. وكان شعاره "القدرة على تلقي اللكمات من غير انفعال أو خوف مهارة لا تقل أهمية عن القدرة على اللكم".

اتأثرت مسيرته بعلاقاته النسائية المتعددة، وخاض صراعات خارج الحلبة أعنف من داخلها، بعد ما رفض التجنيد في الجيش الأمريكي لخوض حرب فيتنام لأسباب دينية وإنسانية، فاتحول من بطل العالم وأسطورة رياضية لشخص خاين بيتسحب منه لقب البطولة واتحكم عليه بالسجن وكمان بيرفضوا يلعب ماتشات في الولايات الأمريكية. لأول مرة في حياته كان بيقابل خصم متفوق عليه في كل شئ تقريبًا، خصم مكون من الرأي العام الأبيض والسلطة الأمريكية وتاريخ كبير من العنصرية ضد السود، لكن هل كانت دي الأسباب الرئيسية في رفضه لخوض الحرب؟ وإزاي انتهت أشهر قضية في المحاكم الأمريكية لصالحه؟ 

محمد علي كتاب بالعامية المصرية من سلسلة «الدحيحة»، بصوت «الدحيح» أحمد الغندور، ومن تأليف طاهر المعتز بالله مؤلف كتاب الدحيح وأحد كتّاب أهم وأشهر حلقات البرنامج.

من إنتاجات ستوريتل الأصلية

استمع الآن.

الدحيحة - محمد علي كلاي

قصة حياة الحاج مالك الشباز.

في مايو 1925 تحديدًا في مدينة أوماها بولاية نبراسكا، اتولد مالكوم ليتل ومعاه نبوءته. مالكوم ابن العائلة الفقيرة لأب داعية مسيحي فقير وأم ذات شخصية قوية وشجاعة، كان بيحمل صفات اسم المدينة اللي اتولد فيها. أوماها، تعني المشي عكس التيار!

من هو مالكوم ليتل الذي تحول لمالكوم إكس؟ وإزاي قصة حياته كانت مؤثرة في المجتمع الأمريكي؟ بعد ما كان شاب حياته كلها بين إدمان المخدرات والرهانات وسرقة البيوت، اتحول داخل السجن إلي قارئ ومثقف مهتم بالحقوق المدنية وحريات السود، وتاريخ العبودية والاستعمار. اكتشف قدرته وموهبته في الخطابة وإلهام الجماهير وساهم في دخول عشرات الآلاف من الأمريكان إلى الإسلام!

من أكتر الشخصيات تأثيرًا في القرن العشرين، الأب الروحي لمحمد علي كلاي، والخصم اللدود لمارتن لوثر كينج. أهم أعضاء منظمة أمة الإسلام المنادية باستقلالهم عن المجتمع الأمريكي، وبتشوف إن الجنس الأسود هو أصل الوجود. صاحب قصة حياة تراجيدية كان بيبحث فيها عن نفسه بغرض الوصول للحقيقة، انتهت باغتياله على يد معلمه السابق ووسط جماهيره!

مالكوم إكس كتاب بالعامية المصرية من سلسلة «الدحيحة»، بصوت «الدحيح» أحمد الغندور، ومن تأليف طاهر المعتز بالله مؤلف كتاب الدحيح وأحد كتّاب أهم وأشهر حلقات البرنامج.

من إنتاجات ستوريتل الأصلية

استمع الآن.

الدحيحة - مالكوم إكس

هل يرضيك كل هذا الظلم يا جبلاوي؟

بعد نجاحه في نشر أول رواية أخد أجره خمسميت نسخة من الناشر، نزل على عربية حنطور يلف على المكتبات لحد ما لقى مكتبة في باب اللوق وافقت تعرضهم عندها، لكنها مش هتديله أجر غير بعد بيع نسخ من الرواية! وافق طبعًا، وفضل يروح كل يوم يتطمن في حد اشترى الرواية ولا لأ، وفي يوم ملقاش ولا نسخة على الرف، وكان في شدة السعادة لحد ما صاحب المكتبه بلغه بإنه شالهم عشان واخدين مكان على الرف ومحدش بيشتريهم!

قصة أديب مصر الأعظم، نجيب محفوظ، من لحظة ولادته المتعثرة لطفولته الثرية ما بين المتاحف الفرعونية وأفلام تشارلي تشابلن ومسرحيات الريحاني وعلي الكسار، حب القصص من شعر الربابة في قهاوي الجمالية لكاتب كبير له نظام يومي قاسي للكتابة تلات ساعات يوميًا، وكواليس كتابة روايات خالدة زي الحرافيش وأولاد حارتنا وثرثرة فوق النيل. 

زي ما توجته الكتابة بالفوز بجايزة نوبل في الآداب كادت تتسبب في اعتقاله أكتر من مرة وجرت عليه التجريح من كتاب كبار زي يوسف إدريس اللي اتهمه بإن فوزه بالجايزة كانت تكريمًا ليه من الصهيونية العالمية بسبب دعمه للسلام مع إسرائيل، دا غير إنها كانت فرصة للجماعات الإسلامية بإثارة الكلام عن رمزية رواية أولاد حارتنا ومحاولة اغتياله في منتصف التسعينات!

نجيب محفوظ كتاب بالعامية المصرية من سلسلة «الدحيحة»، بصوت «الدحيح» أحمد الغندور، ومن تأليف طاهر المعتز بالله مؤلف كتاب الدحيح وأحد كتّاب أهم وأشهر حلقات البرنامج.

من إنتاجات ستوريتل الأصلية

استمع الآن.

الدحيحة - نجيب محفوظ

ما هي تكلفة الكذب؟ 

في 26 أبريل 1986، على بُعد حوالي 130 كيلو متر من مدينة كييف عاصمة أوكرانيا، اللي كانت وقتها جزء من الاتحاد السوفيتي، أدّى اختبار مش مُصرَّح بيه وخطأ في التشغيل بعد قفل توربينات المياه المستخدمة في تبريد اليورانيوم وتوليد الكهرباء، إلى ارتفاع حرارة اليورانيوم في المفاعل الرابع في محطة تشرنوبل للقوى النووية، وفقدان السيطرة على المفاعل، فحصل انفجار وحريق كبير دمَّر مبنى المفاعل وطلَّع كميات كبيرة من الإشعاع في الغلاف الجوي. 

إهمال المديرين لقواعد الأمان والسلامة، زوِّد درجة حرارة وقود اليورانيوم في المفاعل وانصهر من الحواجز الواقية، وحصل الخلل بسبب تراكم أخطاء بشرية وقلة خبرة مهندسين شبان قاموا بالمناوبة في الليلة دي. كل دا عمل اضطراب في إمدادات الطاقة في جمهورية أوكرانيا، والمصانع قفلت، واتعطلت المزارع، ووصلت الخساير المادية أكتر من تلاتة مليار دولار أمريكي تقريبًا. 

كارثة تشيرنوبل مُصنفة عالميًا كأسوأ كارثة للتسرب الإشعاعي والتلوث البيئي شافتها البشرية لغاية دلوقت. والتقارير الرسمية بتقول إن فيه واحد وتلاتين شخص ماتوا بسبب الانفجار، لكن تقديرات الأمم المتحدة بتقول إن الضحايا ممكن يكونوا أربعتلاف شخص بسبب التعرض للإشعاع، وشككت منظمات دولية تانية في الأرقام دي وتوقعت وفاة ما بين عشرتلاف وأكتر من تسعين ألف شخص نتيجة إصابتهم بسرطان الغدة الدرقية المميت. 

اللي حصل في تشرنوبل ونتايجه، كان المُحرك الأساسي لتفكيك الاتحاد السوفيتي، وبداية انهيار الشيوعية والاشتراكية والمادية، لإن كل النظريات والقيم دي عجزت عن استيعاب الكارثة، أو بمعنى أصح الكارثة أكدت زيف القيم والشعارات اللي كانوا بيؤمنوا بيها. إزاي حصل كل دا؟

ويا ترى اللي حصل في أوكرانيا زمان، ممكن يتكرر تاني دلوقتي بالتزامن مع الغزو الروسي لأوكرانيا؟

تشيرنوبل كتاب بالعامية المصرية من سلسلة «الدحيحة»، بصوت «الدحيح» أحمد الغندور، ومن تأليف طاهر المعتز بالله مؤلف كتاب الدحيح وأحد كتّاب أهم وأشهر حلقات البرنامج.

من إنتاجات ستوريتل الأصلية

استمع الآن.

الدحيحة - تشرنوبل

لماذا يحبك الناس؟ - لأنك تحبهم. 

كان حلمه من صغره إنه يبقى لاعب ومدير كرة قدم كبير وناجح. بدأت حكايته مع الكورة بسبب أبوه اللي كان بيعشق كرة القدم وكان قدامه فرصة للعب في نادي كبير في ألمانيا في الخمسينيات، لكن أبوه رفض فمعرفش يحقق حلمه، وكان كل هدفه لما كبر إنه يخلف ولد عشان يحقق اللي هو ماعرفش يحققه. 

درَّب كلوب الأب ابنه من سن صغير جدًا، لإنه كان مقتنع إن الجهد أهم من الموهبة، فكان بيمرنه تدريبات كروية خاصة، ويحاول ينمي قدراته الجسدية والعقلية. ورغم معاناة يورجن من تحكم الأب وتربيته الصارمة، إلا إنه بيعترف فيما بعد إن كل اللي وصل له من نجاحات كان بسبب اللي عمله معاه والده. 

بدأ حلم كلوب يتحقق في عُمر ستاشر سنة، لما انضم لنادي الهواة «إيرجينزينغين»، وبعدها انتقل لنادي «ماينز» اللي قضى فيه أغلب مسيرته كلاعب بيحلم يصعد لدوري الدرجة الأولى، ولظروف النادي اضطر يتولى تدريب الفريق وهو لسه لاعب جواه! ومن وقتها وهو قرر يصب كل تركيزه في التدريب، ودا كان تغيير مهم في مسار حياته. إزاي بقى «يورجن كلوب» من أفضل المدربين في العالم؟ وإيه السر في إنه بيراهن وبيصمم يدرب فرق مستواها متراجع؟ وإيه الدروس اللي نتعلمها من تجربته؟ 

يورجن كلوب كتاب بالعامية المصرية من سلسلة «الدحيحة»، بصوت «الدحيح» أحمد الغندور، ومن تأليف طاهر المعتز بالله مؤلف كتاب الدحيح وأحد كتّاب أهم وأشهر حلقات البرنامج.

من إنتاجات ستوريتل الأصلية

استمع الآن.

الدحيحة - يورجن كلوب

العالم قرية صغيرة في أخطر شركة في العالم. 

طفل عنده عشر سنين، والده بيشتري له كمبيوتر خاص وبيعلِّمُه البرمجة من كتر شغفه بيها، لدرجة إنه في السن دا كان بيروح ياخد كورس دراسات عليا في البرمجة في الجامعة بعد ما بيخلَّص يومه الدراسي في المدرسة. الطفل دا كان كل يوم يروح المدرسة ويرجع ياكل ويعمل الواجب ويقعد يبرمج خمس ساعات وبيزيدوا لحوالي ستاشر ساعة في نهاية الأسبوع، وقدر يعمل نسخ من ألعابه اللي بيحبها، ومن ضمنها نسخة من لعبة "ريسك" اللي هدفها السيطرة على العالم في عصر الدولة الرومانية، اللاعب فيها بينافس يوليوس قيصر، وكان الطفل بيقدر يكسب كل مرة! 

الطفل دا بيكبر وبيبقى صاحب شركة عملاقة بتسيطر على أهم مواقع التواصل الاجتماعي بيستخدمها أكتر من اتنين مليار شخص، وهي شركة فيسبوك اللي تحولت إلى «ميتا»، اللي تعتبر نقلة كبيرة في تقنيات واستخدامات الواقع الافتراضي. رحلة شيقة بخطوات واسعة قدر خلالها «مارك زوكربيرج» يتحول من طفل بيحب الإلكترونيات زي والده طبيب الأسنان إلى مبرمج كبير وراجل أعمال سابق عصره ومنافسيه. إزاي قدر يحقق كل دا وهو لسه في أوائل التلاتينات؟ وإيه الصعوبات اللي واجهها في البداية أو بيواجهها طول الوقت في شركته؟ وإزاي بيقدر يراوغ طول الوقت ويخرج من معاركه ولو بانتصارات صغيرة؟ وإيه مدى تأثير المواقع اللي هو بيديرها على مستخدميها؟ وإزاي حقق حلم طفولته وقدر يتحكم في سلوكيات مليارات من البشر، لدرجة تأثيرها على الانتخابات الأمريكية!
 
فيسبوك أخطر شركة في العالم كتاب بالعامية المصرية من سلسلة «الدحيحة»، بصوت «الدحيح» أحمد الغندور، ومن تأليف طاهر المعتز بالله مؤلف كتاب الدحيح وأحد كتّاب أهم وأشهر حلقات البرنامج.

من إنتاجات ستوريتل الأصلية

استمع الآن.

الدحيحة - فيسبوك - أخطر شركة في العالم

لا وقت للانتظار. 

لما بنتفرج على أفلامه، غالبًا بنبقى متأكدين من إننا هنحس بقدر كبير من المتعة وهنشوف حاجة مختلفة مليانة بالخيال والألغاز والإثارة، ومع كل إعادة مشاهدة بنكتشف حاجات جديدة. ودايمًا أفلامه بتاخدنا لمواضيع مهمة زي الوجودية والمعرفة والتجربة الذاتية وتشويه الذاكرة والأخلاق الإنسانية والأحلام وطبيعة الزمن وبناء الهوية الشخصية. قدر يحط بصمته بجدارة في صناعة السينما. 

في لندن سنة 1970، اتولد «كريستوفر نولان» لأب إنجليزي بيشتغل في مجال الدعاية، وأُم أمريكية مضيفة طيران ومُدرسة لغة إنجليزية، ودا خلاه يتنقل في طفولته بين لندن وشيكاغو. وفي سن صغير جدًا، خلال زيارتهم لأمريكا، اتفرج على فيلم "ستار وارز" في السينما مع والده. ومن ساعتها وهو ندهته نداهة السينما والعوالم الخيالية دي، اللي تقدر تحول من خلالها أحلامك وخيالاتك لصور يتفرج عليها الناس. 

لما والده حس بهوسه بالسينما، سمح له يستخدم الكاميرا بتاعته، اللي كانت بدائية وبتصور مقاطع مدتها دقيقتين ونص ومن غير صوت، بس في عمر سبع سنين قدر بيها يقلد أفلام الفضاء اللي شافها، واستخدم الطين والدقيق وكراتين البيض كديكور واتفنن في صنع خدع بصرية. ولما بقى عنده حداشر سنة، قرر إنه لازم يبقى مخرج مُحترف، بس للأسف في الوقت دا والده قرر يدخله مدرسة داخلي في لندن حرمته من السينما ومن الإخراج. إزاي قدر يتغلب على دا؟ وإزاي لما كبر بقا واحد من أهم مخرجين السينما في العالم؟ 

كريستوفر نولان كتاب بالعامية المصرية من سلسلة «الدحيحة»، بصوت «الدحيح» أحمد الغندور، ومن تأليف طاهر المعتز بالله مؤلف كتاب الدحيح وأحد كتّاب أهم وأشهر حلقات البرنامج.

من إنتاجات ستوريتل الأصلية

استمع الآن.

الدحيحة - كريستوفر نولان

قول للزمان ارجع زمكان. 

في طفولته، كان فيه حدثين مهمين أثروا عليه: الأول لما والده جابله بوصلة وهو عنده خمس سنين، فاحتار من القوة غير المرئية اللي بتحرك إبرة البوصلة. والحدث التاني في سن اتناشر سنة لما اتعرّف على طالب الطب الشاب «ماكس تالمود» اللي أهداه كتاب في علم الهندسة، فاستوعبه بسرعة رهيبة واعتبره «كتاب الهندسة الصغير المقدس»، ولما ساعده «تالمود» أكتر على التبحر في الرياضيات والفلسفة، وعرفه على سلسلة علوم للناشئين، وهي كتب مبسطة في الفيزيا كتبها «آرون بيرنشتاين». 

في سنة 1879، اتولد أبو الفيزيا الحديثة «ألبرت أينشتاين» لأسرة يهودية في ألمانيا. مكانش يبان عليه كطفل عنده مشاكل في الكلام والنطق لغاية تلات سنين وبيعاني من صعوبات تعلم في المدرسة وبيشتكي منه المدرسين وبيطردوه كل شوية، إنه لما هيكبر هيغير مسار العلم وهيبقى مضرب مثل في العبقرية، وإنه بفكرة صغيرة هيوصل لها بخياله الجامح هيعمل انقلاب كامل في الفيزيا وفهمها للطبيعة. ليه تعتبر النظريات اللي وصل لها نقلة علمية كبيرة؟ وإيه اللي حصل في حياته عشان يحقق كل دا؟ وإيه هي التحولات الفكرية اللي مر بيها؟ وإيه علاقته بالقصف النووي على هيروشيما وناجازاكي؟ وإيه هي أحلامه السياسية اللي اتحولت لكوابيس؟

ألبرت أينشتاين كتاب بالعامية المصرية من سلسلة «الدحيحة»، بصوت «الدحيح» أحمد الغندور، ومن تأليف طاهر المعتز بالله مؤلف كتاب الدحيح وأحد كتّاب أهم وأشهر حلقات البرنامج.

من إنتاجات ستوريتل الأصلية

استمع الآن.

الدحيحة - ألبرت أينشتاين

الرقص مع الأفاعي. 

في 31 أغسطس 1997 بعد نُص الليل، وفي نفق على بُعد أقل من ميل من برج إيفل في باريس، حادثة سيارة مريبة راحت ضحيتها الأميرة ديانا وصديقها دودي فايد والسواق هنري بول. بعد وفاتها المأساوية، العالم كله تساءل وقتها مين اللي قتل ديانا، وظهرت نظريات كتير بتقول إن فيه مؤامرة اتدبرت لاغتيالها هي والفايد. 
 
ديانا واحدة من أشهر النساء على وجه الأرض. سابت وراها إرث كبير من العمل الإنساني ولعبت دور مهم جدًا في تغيير صورة الملكية البريطانية. لكنها عاشت حياة درامية مليانة ألم وغدر وخيانة. إزاي كانت بتمتلك كل اللي بيتمناه أي إنسان وانتهت حياتها بلا شيء؟ وهل حادثة موتها كانت مدبرة؟ ومين اللي وراها؟ وليه انهار زواجها من الأمير تشارلز؟ وهل كانت حامل بأخ مصري لوريث العرش؟ أسئلة وإجابات كتيرة في واحدة من أكتر القصص الدرامية في القرن العشرين.

«ديانا» كتاب بالعامية المصرية من سلسلة «الدحيحة»، بصوت «طاهر المعتز بالله»؛ مؤلف السلسلة و كتاب الدحيح وأحد كتّاب أهم وأشهر حلقات البرنامج. 

من إنتاجات ستوريتل الأصلية.

استمع الآن.

الدحيحة - ديانا

بطل العالم في مواجهة الاكتئاب! 

من أبوين أيرلنديين، اتولد تايسون فيوري في سنة 1988، لكنه اتولد قبل ميعاده بتلات شهور، وبوزن 450 جرام تقريبًا. كان أقرب للموت وقتها، لكن تشاء الأقدار إنه يعيش ويكون واحد من أعظم ملاكمي الوزن التقيل عبر العصور.

في العشرينات من عمره، تايسون فيوري بقا بطل العالم في الوزن التقيل للملاكمة. اتحول من غجري بيكافح في حياته لواحد من أشهر الرياضيين في العالم. بقا عنده كل اللي بيحلم بيه: الفلوس والشهرة والنجاح والألقاب، وزواج سعيد وخَمس أطفال. 

ورغم كل دا عانى من اكتئاب شديد وخسر كل حاجة وكان على وشك الانتحار! إيه هي رحلة الملاكم تايسون الملقب بملك الغجر؟ وإيه سر عدم هزيمته في أي مباراة؟ وإزاي قدر يتخطى السقوط والانتحار ويحارب الكحول والإدمان والاكتئاب؟ وإزاي قدر يرجع للقمة تاني، وبعد سنتين يستعيد لقبه بعد هزيمته للأمريكي «ديونتاي وايلدر»؟ وليه اعتزل وهو في التلاتينات من عمره؟ 

«تايسون فيوري» كتاب بالعامية المصرية من سلسلة «الدحيحة»، بصوت «طاهر المعتز بالله»؛ مؤلف السلسلة و كتاب الدحيح وأحد كتّاب أهم وأشهر حلقات البرنامج. 

من إنتاجات ستوريتل الأصلية.

استمع الآن.

الدحيحة - تايسون فيوري

بعد كل هذا الوقت؟ إلى الأبد. 

كانت فقيرة وتكاد تكون بلا مأوى وعايشة على إعانات الدولة، وكتبت كتابتها من مقهى بيسمح لها تقعد طالما إنها بتطلب مشروب. كان عندها طفل صغير ومطلقة ووالدتها مُشخصة بمرض التصلب العصبي المتعدد. وفوق كل دا، كانت بتعاني من الاكتئاب وبتفكر في الانتحار. لكن كل دا مخلهاش تبطل تحلم تحقق طموحها في إنها تبقى كاتبة. 

في سنة 1990، وهي منتظرة قطار رايح لندن، بدأت مؤلفة مغمورة اسمها «جوان رولينج» تفكر في فكرة إن ولد مراهق يدخل مدرسة للسحرة. ومن هنا اتولدت فكرة سلسلة هاري بوتر الشهيرة، لكن الموضوع كان محتاج أكتر من عصاية سحرية وتعويذة عشان يظهر للنور، وكان وراه معاناة وتعب كبير جدًا. إزاي قدرت أم منفصلة وبتعاني من البطالة إنها تبقى أول كاتبة مليارديرة في التاريخ؟ وإزاي قدرت تخلق عالم هاري بوتر المذهل بكل تفاصيله؟ وإيه اللي ألهمها بمخلوقات الديمنتورات المظلمة؟ وإيه اللي ممكن تكون شافته في مرآة إريسيد؟! 

«جي كي رولينغ» كتاب بالعامية المصرية من سلسلة «الدحيحة»، بصوت «طاهر المعتز بالله»؛ مؤلف السلسلة و كتاب الدحيح وأحد كتّاب أهم وأشهر حلقات البرنامج. 

من إنتاجات ستوريتل الأصلية.

استمع الآن.

الدحيحة - سلسلة الكتب

الدحيحة - سلسلة الكتب

الدحيحة كتب بالترتيب

الاستماع والقراءة